Иако процесот може да делува обесхрабрувачки, упорноста е клучна. Но ако редовно добивате одбивања, можеби е време повторно да го разгледате вашиот CV.
Поранешната рекрутерка Софи, Британка која работи во Стокхолм, сподели неколку најчести грешки што кандидатите ги прават – а кои компаниите едноставно не сакаат да ги видат. „Како поранешен рекрутер, ова се работите што не сакам да ги гледам во вашиот CV“, објаснува таа во едно TikTok видео.
1. Точна домашна адреса
Иако е корисно да го наведете градот во кој живеете, Софи истакнува дека нема потреба да ја откривате целата адреса.
„Не мора да знам на која улица и под кој број живеете“, вели таа.
2. Непрофесионална e-mail адреса
Сите се сеќаваме на нашата прва електронска адреса – често поврзана со некој хоби или смешен прекар. Но, таквите адреси денес можат да остават лош впечаток.
„Непрофесионални адреси како ‘[email protected]’ не изгледаат сериозно“, вели Софи.
Ако немате соодветна e-mail адреса, направете нова посебно за деловна комуникација, која ќе содржи само вашето име и презиме.
3. Непримерни фотографии
Многумина сакаат да додадат фотографија во CV-то, особено ако аплицираат за работа со контакт со клиенти. Но Софи предупредува дека погрешната фотографија може да направи повеќе штета отколку корист.
„Ако ставате фотографија, нека не биде селфи, ниту фотографија со вашето куче“, советува таа.
Платформата Indeed.com дополнително препорачува да се изостави фотографијата целосно, за да се избегне несвесна пристрасност и за CV-то да изгледа поконцизно.
4. Лични податоци и хобија
Според Софи, во CV нема место за информации како брачен статус или хобија.
„Може да зависи од компанијата, но генерално – ако викендите играте тенис, тоа на рекрутерот ништо не му значи“, објаснува таа.
5. Начинот на кој го опишувате искуството
Клучно е да избегнувате да користите ‘јас’ во речениците, бидејќи тоа се подразбира.
„Наместо тоа, започнете со акциски глаголи како ‘водев’, ‘координирав’, ‘советував’“, препорачува Софи.
Дополнително, таа издвојува и една реченица која смета дека е целосно непотребна:
„Референци достапни на барање.“
„Бројот на CV-а што ги имам видено со оваа реченица е неверојатен – а сепак, знам дека можам да побарам референци кога ми требаат“, додава Софи.
Заклучок:
Модерно и професионално CV треба да биде јасно, кратко и релевантно.
Без непотребни детали, без неформални адреси и без „шарени“ фотографии – само содржина што го покажува вашиот реален професионален капацитет.
